Plantun de Prouvènço

Pèr coumpara dos planto d'encò nostre

Erodium acaule & Cyperus esculentus

Aguïeto(-sènso-cambo)

Erodium acaule

Geraniaceae

Àutri noum : Aguïo, Aguïoun.

Noms en français : Bec-de-grue acaule, Bec-de-grue sans tige.

Descripcioun :
Aquesto aguïeto renadivo sèmblo à sa cousino mai coumuno Erodium cicutarium , mai se pòu destria eisadamen. I'a ges de tijo (de pas counfoundre emé li pecou de flour) e li fueio soun tóuti à la baso. Pièi li petalo soun mai largo e s'encauvaucon, ço qu'èi jamai lou cas pèr l'aguïeto coumuno. Coumpara emé l'aguïeto.

Usanço :
Poudèn pensa qu'èi manjadisso e a li mémis usanço que Erodium cicutarium .

Port : Erbo
Taio : 5 à 20 cm
Fueio : basalo
Tipe bioulougico : Emicriptoufite
Cicle bioulougico : Planto renadivo

Gènre : Erodium
Famiho : Geraniaceae

Ordre : Geraniales

Coulour de la flour : Vióuleto
Petalo : 5
Ø (o loungour) flour : Pancaro entresigna
Flourido : Printems - Estiéu - Autouno

Sòu : Ca
Autour basso e auto : 0 à 1200 m
Aparado : Noun
Mars à juliet

Liò : Champ - Camin
Estànci : Termoumediterran à Mountagnard
Couroulougi : Estenoumediterrano
Ref. sc. : Erodium acaule (L.) Bech. & Thell., 1928

Triangle(-manjadis)

Cyperus esculentus

Cyperaceae

Nom en français : Souchet comestible.

Descripcioun :
Lou triangle-manjadis trachis dins li limas de ribiero o li culturo. Pèr l'ouro n'i'a pas gaire au nostre, soulamen un pau au couchant. Se recounèis à sis enflourejado jauno daurado e subretout à si cabosso o tubercule. Douno un pau d'èr à Cyperus rotundus que fai de cabosso negro. La varieta presentado eici, Leptostachyus, èi naturalisado (óurigino Americo de l'uba).

Usanço :
Coume lou dis soun noum es uno planto manjadisso. En Espagno s'adoubo emé lou tubercule l'horchata de chufa, valènt-à-dire l'ourjado de triangle. Se fai tambèn un òli de qualita, richo en vitamino E e bon pèr la pèu.